Trúðarlív Húsavíkar og Dals kirkjur



Tann kirkjan, ið nú stendur í Húsavík, er vígd í 1863.

Meistari fyri grótarbeiðinum var Magnus Jacobsen, Hósvíks-Magnus kallaður. Meistari fyri timburarbeiðinum var Magnus Olsen í Koytu á Sandi. Kollfirðingar skulu eisini hava verið við til at byggja kirkjuna.

Tummas við Á sigur frá, at fyrst tóku teir grót upp í Varða inna fyri Grótgerði, men grótið var ringt, og tí varð farið oman á Magnusarbakka, har alt grótið varð heintað. Grótveggurin er hálvaðru alin tjúkkur. Súsanna í Skumpitoft segði frá pápa sínum Hanusi, at farið var undir arbeiðið á leypársmessu, og longu ein mánað seinni, á mariumessu, skuldi vera liðugt at laða.

Í juli mánaði bað byggimeistarin um, at kirkjan skuldi standa eitt ár. Orsøkin var, at landnyrðingshornið fekk ongan botn. Teir drivu tí trø niðurí, so langt sum teir fingu tey, koyrdu grót niðuryvir og settu veggin á. Kirkjan stóð so eitt ár. Síðani varð farið undir timburarbeiðið. Tá ið teir settu sperrurnar á, vildi veggurin skjótast útav. Syllin helt ikki, hóast hon var 18 tummar breið og 8 tummar tjúkk. Niels L. Arge á Argjum, gjørdi tí reiðskap til at spenna saman við: tvær langar stengur og tvær stórar plátur. Enn sæst hvussu saman er bundið við jarni út í veggin.

Uttan var kirkjan 27 alin long og 15 alin breið. Klæmint á Granda vildi hava kirkjuna so stóra, at Sands kirkja kundi standa inni í henni. Kirkjan er takt við nævur og flag.

Hin 7. september 1863 boðaði bygginevndin frá, at kirkjan var liðug at víga og taka í nýtslu.

Hin 13. september 1863 varð Húsavíkar kirkja vígd av Djurhuus prósti.

[KELDA: J. P. Gregoriussen, Eldru Hválvkirkjurnar]

Kirkjuráðið

Formaður
Eisenbjørg Clementsen, Frammi við Ánni 28, 230 Húsavík, tlf. 361582/224583 Teldupostadr.: eclementsen@hotmail.com




Dals kirkja
Í árinum 1953 hin 27. januar vóru dalbingar komnir saman til fundar í skúlanum, eftir áheitan frá Malvinu Clementsen, lærarinnu, fyri at tala um at fáa kirkju í bygdini. Á fundinum komu tey ásamt um, at fyrst skuldi kirkjugarðurin, sum kirkjan skuldi standa í, gerast. Ein bygginevnd var sett í hesum sambandi.

Nevndin kom fram til, at best var at leggja nýggja kirkjugarðin á hin slætta bøin suðuri í Túni. Og 30. apríl sama ár varð samtykt at lata Ludvig S. Johannesen turrleggja lendið.

Hin 28. desember 1953 varð arbeiði uppá sjálvan kirkjugarðin boðið út. Og tá bert eitt tilboð kom inn, varð avgjørt hin 24. oktober 1954, at lata Óla Groth Johannesen gera arbeiði við tí treyt, at garðurin skuldi vera gjørdur innan eitt ár.

Ímeðan arbeiði uppá kirkjugarðin var ígongd arbeiddi nevndin víðari við kirkjuætlanini. 1. august 1953 varð ein tekning og ein leyslig kostnaðarmeting, sum arkitekturin S.J. Hofgaard á Tvøroyri hevði gjørt, send Føroya Løgtingið. Í fyrstu atløgu fekst eingin fígging frá Løgtinginum og niðurstøðan hjá nevndini var eisini tann, at uppskotið helst fór at verða ov kostnaðarmikið.

Í nevndaráliti í løgtingsmáli nr. 31/1954 (vetrarting) Kirkja í Dali verður m.a. soleiðis sagt: Bygginevndin hevur sent tinginum nýggja umsókn, dagf. 24. august við nýggjari tekning gjørd av harra Sverra Dahl, fornfrøðingi og K. Kristoffersen, verkfrøðingi, og mælir til smærri broytingar. Føroya próstur mælir til at góðkenna tekningina sum høvuðsgrundarlag við smærri broytingum og upplýsir, at ætlanina er at gera kirkjuna av timburi og tekja hana við skifursteini.

Í apríl mánaði í 1956 fekk bygginevndin at vita, at løgtingið hevði samtykt broytingaruppskotið frá kirkjunevndini og at peningur varð játtaður. Men langt tann størsta partin av fíggingini fingu dalbingar sjálvir til vega.

Tá timburarbeiði fór ígongd í juni mánaði 1956, høvdu dalbingar laða grundina og trappurnar. Fyri timburarbeiðinum stóð Jakob Oluf Jakobsen, byggimeistari úr Fuglafirði.

Klokkan seks á kvøldi 19. oktober 1957 hoyrdist kirkjuklokkan á fyrsta sinni ringja í Dals bygd, og sunnudagin t. 20 oktober varð kirkjan vígd av Jákup Joensen prósti.

Kirkjan er góðar 6 m breið og 11,9m long. Á norðursíðuni vestan er forkirkjan, ein útbygningur, sum er 3,8m langur og 3,6m breiður.

[KELDA: J. P. Gregoriussen, Nýggjaru Kirkjurnar]

Kirkjuráðið

Formaður
Sjúrður Nolsøe, Dalsvegur 18, 235 Dalur tlf. 261403/265271